|
Sa mill-bidu tat-twaqqif tal-Parroċċa, fl-1905,
il-Komunità tal-Patrijiet Franġiskani flimkien
mar-residenti, kienet tagħmel Festi lil Madonna taħt
it-titlu ta’ Marija tas-seba’ duluri, li dawn
il-festi kienu jsiru fil-15 ta’ Settembru,
eżattament fil-Jum Liturġiku tad-Duluri. Kienu
jagħmlu ħilithom biex jorgannizaw Festa xierqa
lill-Patruna tagħhom.
Matul iż-żmien, id-diettanti tal-Festa f’raħalna
beda’ jiżdied u għalhekk, propju fl-1969, inħass
il-ħtieġa li jitwaqqaf l-ewwel Kumitat. Illum wara
tant u tant snin uħud mill-anzjani tagħna jifirħu li
jaraw lilna li nirsistu biex nagħmlulha Festa
lis-Sultana Tagħna. Il-parteċipazzjoni tal-mara u
taż-żgħażagħ f’dawn l-aħħar snin ma naqsitx ukoll,
għalhekk inħasset il-ħtieġa wkoll li jigu iffurmati
żewġ
fergħat
fi ħdan il-Kumitat Festa, dak
tal-Kumitat Nisa, li jieħdu ħsieb diversi attivitajiet bħal
tombla, ħruġ u l-kċina fl-attivitajiet tal-Kumitat u
l-Kummissjoni Żgħażagħ li jorganizzaw tournaments,
discos u diversi attivitajiet oħra kollha b’għan
wieħed....għal Festa ta’ Marija Addolorata Sultana
tal-Martri.
Bil-parteċipazzjoni, bl-għajnuna, bis-sagrifiċċji u
bid-dedikazzjoni tal-membri, illum il-ġurnata tista’
tgħid li l-Festa tagħna, ta’ Marija Addolorata
Sultana tal-Martri, hija waħda fost l-ikbar festi li
tiġi iċċelebrat fin-naħa ta’ fuq ta’ Malta u għal
dan aħna lkoll kburin u nirringrazzjaw lil
missirijietna li bil-ftit tagħhom ta’ żmienhom,
illum għandna Festa kif verament jixirqilha
lis-Sultana tagħna.
L-irwol tal-Kumitat Festa huwa li jagħti s-sehem
tiegħu fil-Parroċċa tul is-sena kollha u f’kull ma
jirrikjedi, però bla dubju hija l-Festa Titulari
l-qofol tiegħu fejn tirrikjedi ħafna xogħol u
preparamenti kemm mil-lat materjali, bħal restawr
ta’ l-armar, proġetti ġodda eċċ, kif ukoll
l-organizzazzjoni tal-Festa innifisa, fil-jiem
tas-settena, lejliet u nhar il-Festa
L-attività tal-Membri tal-Kumitat Festa Marija
Addolorata Sultana tal-Martri, San Pawl il-Baħar
hi diversa. Għal żmien il-Festa jieħu ħsieb
il-programm kollu u jħalli f’idejn il-Każin
tal-Banda San Pawl biex torganiżża l-marċi
mit-Tnejn sas-Sibt.
Matul is-sena il-Kumitat jitħabat biex jaħdem:
- Għal armar ġdid biex jitkompla t-tiżjin fit-toroq.
- Biex isebbaħ dak li diġa’ sar.
- Biex idur u jirrestawra dak li diġa’ għandu bħala
armar.
- U jaraw li għal Festa kollox ikun kif għandu jkun,
permessi, nar, armar,
tmexxija taċ-ċelebrazzjonijiet u mhux b’inqass
il-briju.
|
