NIĊĊELEBRAW IL-FESTA
FROTT IL-FERĦ TAL-FIDI TAGĦNA!

Illum aktar minn qatt qabel, aktar nies qed jistaqsu jekk għadhiex tagħmel sens li niċċelebraw il-festi kif qed jiġu ċelebrati f’diversi bliet u rħula ta’ Malta. Infatti, anke l-Knisja ħarġet dokument biex tippurifika w iġġedded il-festi Maltin biex jibqgħu jiġu ċelebrati, imma ċelebrati fi spirtu tabilħaqq nisrani! Iċ-ċentru tal-festa għandu jkun il-qaddis jew qaddisa li aħna niċċelebraw, fil-kas tagħna Marija Addolorata, rebbieħa fuq it-tbatijiet tagħha għax għarfet tkun f’għaqda sħiħa mar-rieda t’Alla! U anke Marija Omm Ġesù u Ommna, bħal Qaddisin l-oħra kollha, għandha tkun iċċelebrata u ffesteġjata fid-dawl taċ-ċentralita’ tat-twemmin tagħna: Kristu! Il-Mulej Ġesù għandu jkun iċ-ċentru ta’ kull festa. Il-ferħ u l-briju tal-festa għandu jkun ġej mill-ġewwieni tagħna, imħejji tajjeb mill-mixja tagħna nisranija. Bluha tal-bluhat u kollha bluha tkun il-festa jekk għalina tkun biss festa soċjo-kulturali!

Il-parroċċa tagħna dejjem kienet moderata fiċ-ċelebrazzjoni tal-festa titulari tagħha. Għall-grazzja t’Alla qatt ma kellna piki żejda u ġlied. Dan hu plus point għalina u fuq dan irridu nkomplu nibnu. Ikun bla sens li aħna nippruvaw nimitaw dak li jagħmel ħaddieħor biex mingħalina ser inkabbru l-festa. L-isbaħ festa li nistgħu niċċelebraw hi fl-armonija u l-imħabba ta’ bejnietna. Il-ferħ, il-briju huma sbieħ u għandna bżonnhom anke fil-festa, dejjem jekk ikunu bil-moderazzjoni u frott tal-festa li qed niċċelebraw!

Għalhekk, b’qalbi kollha nħeġġeġ lill-parruċċani kollha, b’mod speċjali lil dawk li b’xi mod huma nvoluti fil-festa u jgħixu aktar mill-qrib dawn il-jiem speċjali fil-kalendarju tal-parroċċa, biex ikunu minn tal-ewwel li bl-eżempju tagħhom, juru li x-xogħol ta’ ħidmithom, ġej mill-imħabba li għandhom lejn Marija Addolorata u fuq kollox li jgħixu dawn il-jiem bl-entużjażmu li hu l-frott tal-fidi tagħhom fil-Mulej Ġesù!

Fil-Festa ta’ din is-sena Marija Addolorata qed tagħtina ferħ ġdid. Ferħ li hu mnissel mir-rigal tad-don tas-saċerdozzju lil wieħed minn ulied il-parroċċa. L-ordinazzjoni saċerdotali ta’ Patri Mario Sant imliet il-parroċċa b’entużjażmu ġdid li hu frott ta’ kull don li l-Mulej Ġesù jagħtina. Il-preżenza ta’ ħafna mill-parroċċa fil-Katidral tal-Mdina għall-ordinazzjoni tiegħu, fosthom żgħażagħ u tfal, uriet li s-saċerdot għadu ferm apprezzat. Filwaqt li nifirħu u nkomplu ningħaqdu ma’ Patri Mario, f’ringrazzjament lil Alla għal dan id-don speċjali li għamel lill-parroċċa tagħna u lill-Provinċja tagħna tal-Franġiskani Konventwali, nixtieq inħeġġeġ biex nitolbu dejjem u bla waqfien, ħalli bl-interċessjoni ta’ Marija Addolorata, ż-żgħażagħ tagħna jkunu attenti għas-sejħa li l-Mulej Ġesù jagħmlilhom biex ikunu aktar qrib tiegħu u jservu lill-poplu tiegħU fil-ħajja reliġjuża u saċerdotali.

Nixtieq il-festa t-tajba lil kulħadd: lill-Pawlini u l-Villeġġjanti li jiġu fostna u saru anke parti minna. Il-festa tabilħaqq tgħaqqadna flimkien! Jalla nkomplu nikbru lkoll fl-imħabba lejn Alla u lejn xulxin taħt l-għajnejn mimlija mħabba għalina ta’ Marija Addolorata, Patruna tal-Parroċċa tagħna!
 

P. Joseph Cilia OFMConv.
Kappillan u President tal-Kumitat Festa