Ħbieb, 

Għal darb’oħra erġajt qed niltaqa’ magħkom permezz tas-sit elettroniku tal-Kumitat Festa, sit li bħal ma tistgħu taraw, ikun aġġornat minn żmien għal ieħor, grazzi tmur għall-webmasters tagħna li jieħdu ħsieb li naraw dehra ġdida fis-sit ta’ spiss. 

Meta nħares lura nara kemm il-festa dejjem għamlet l-progress qawwi, grazzi għal kull minn ta’ s-sehem tiegħu minn kemm ilu mwaqqaf  il-Kumitat Festa. F’dik li hija aministrazzjoni nista’ ngħid li tul l-aħħar snin għamilna dak kollu possibli sabiex dejjem naraw l-affarijiet mixjin ’il quddiem, f’dak li huwa manutenzzjoni ta’ l-armar għamilna wkoll progress fejn dorna bosta armar…u la semmejt l-armar antik ma nistax ma nsemmix l-armar ġdid fejn bħal ma tistgħu taraw, kull sena qed jirnexxilna nżannżu xi armar ġdid.  

Dan ikun jista’ jseħħ biss permezz ta’ kulħadd b’mod speċjali nsemmi ż-żgħażagħ tar-raħal għaliex trid tara li warajk hemm min hu lest ikompli jaħdem sabiex tagħmel iktar kuraġġ, bla dubju trid ukoll ir-riżorsi finanzjarji għaliex biex torganizza Festa bħal ma hija tagħna tiswilek eluf kbar ta’ flus. 

Però ma tistax tħares lura u tieqaf hemm, dejjem trid tħares ’il quddiem, tgħaddi festa u mill-għada stess tibda tipprepara għal Festa oħra, b’mod speċjali din is-sena  għaliex hija id-39 sena minn mindu twaqqaf il-Kumitat. Għalhekk hija l-aħħar għatba qabel l-anniversarju ta’ l-40 sena mit-twaqqif tal-Kumitat Festa. Għalina l-membri dan ifisser impenn sħiħ għaliex irridu nagħmlu żgur li l-isem ta’ dan il-Kumitat jibqa’ ħaj u jkompli jżid fil-popolarità tiegħu. 

Nispera li l-materjal tas-sit qiegħed ikun ta’ interess għalikom u nistedinkom tidħlu taraw is-sit frekwenti sabiex iżżommu ruħkom aġġornati ma l-attivitajiet li jkunu ser jiġu organizzati b’risq il-festa.  

Inħeġġiġkom tkomlpu tibgħatu l-kummenti tagħkom permezz tal-guestbook, għaliex nassigurakom li aħna naċċettaw kull parir jew kumment kostruttiv li tgħaddulna u anke napprezzawh.  

Fl-aħħarnett nirringrazzja lill-sħabi l-membri tal-Kumitat Festa Irġiel, Nisa u ż-Żgħażagħ għall-isforzi kbar li jwettqu. Grazzi mill-qalb lill-poplu kollu ta’ San Pawl il-Baħar ta’ l-appoġġ li dejjem nsibu.

Viva Ommna Marija Addolorata.